Starbucks red cup

聖誕預警！Starbucks「紅杯日」慳錢全攻略

各位慳家軍，大家好！我係老慳！
喺英國，有幾樣嘢代表聖誕節正式開始：John Lewis 廣告、周圍亮起嘅聖誕燈飾，仲有... 就係 Starbucks 換上聖誕杯！

每年 11 月，拎住嗰隻紅色杯，影張相，嗰種儀式感真係冇得頂。不過，我哋作為精明嘅「英鄰老慳」，點止飲杯咖啡咁簡單？我哋嘅目標係點樣喺呢個聖誕傳統入面「慳到盡」！

今日老慳就同大家深入拆解一年一度嘅 「Red Cup Day」（紅杯日），點解一杯杯會咁大件事？同埋今年有咩着數！

首先，最緊要嘅嘢講咗先！Mark 實你個行事曆！

🗓️ 日期： 11 月 13 日 (星期四)
🎁 活動： 只要喺當日去 Starbucks 購買任何一款聖誕節日飲品 (Handcrafted Holiday Drink)，就可以免費獲得一個 2025 年限量版嘅「可重用紅色杯」 (Reusable Red Cup)！
⏳ 條件： 送完即止！(手快有，手慢無)

【老慳分析：點解要拎？】

儀式感之鬼： 呢個杯嘅設計每年都唔同，好有收藏價值，拎住佢打卡一流。
真正嘅慳錢： 呢個唔係重點，重點係... 呢隻係 Reusable Cup！你之後成個聖誕季，甚至下年，帶住呢隻杯去 Starbucks 買嘢飲，每次都有 25p 折扣！呢個先係「英鄰老慳」嘅真正目標！變相飲品錢換埋隻杯，仲有未來折扣，絕對係「一雞兩味」！

可能新嚟英國嘅朋友會問：「使唔使呀？為隻膠杯...」

哎，你唔好睇小呢隻杯，佢背後有段故㗎！

Starbucks 嘅聖誕杯傳統早喺 1997 年已經開始。不過，你估唔到嘅係，第一代嘅聖誕杯並唔係紅色嘅！而係用咗寶石色調（例如紫色、藍色）做設計。

直到 1999 年，Starbucks 先推出咗第一款真正「標誌性」嘅紅色聖誕杯，即刻引起熱潮。自此之後，每年推出唔同設計嘅紅杯，就變成咗聖誕節嘅一個非官方「起步槍」。

咁「免費送杯」又係幾時開始？

「送杯」（Red Cup Day）呢個傳統就比較近代，大約係 2018 年左右先開始成為年度盛事。Starbucks 發現大家除咗鍾意杯，仲想「擁有」呢份聖誕感，於是就推出呢個「買飲品送可重用版」嘅活動，估唔到反應超級熱烈，演變成而家大家都要Mark實日子去搶嘅「紅杯日」。

每年嘅設計都唔同，有啲年份玩簡約，有啲年份玩插畫。好似今年（2025）嘅紅杯設計，就用咗「Coffeehouse Plaid」（蘇格蘭格紋）同「Merry Apron Strings」（聖誕圍裙絲帶）做主題，望落成熟又高貴，啱晒我哋呢啲「英鄰老慳」嘅風格！

好喇，要拎到免費杯，你就要買一杯「聖誕節日飲品」。老慳已經幫大家睇過今年英國 Menu 有咩揀：

1. 【全新登場】朱古力慕絲鮮奶咖啡 (Chocolatey Mousse Latte)
今年嘅主打新品！佢係特濃咖啡，混合咗絲滑嘅「堅果味醬」（Nutty-flavour sauce），再配上朱古力味嘅忌廉 (Whipped Cream) 同可可粉。鍾意朱古力同堅果味嘅朋友，一定要試！

2. 【經典回歸】拖肥果仁鮮奶咖啡 (Toffee Nut Latte)
呢個唔使多介紹，每年聖誕最多人等嘅就係佢！濃郁嘅拖肥糖漿加埋烘烤果仁碎，係最經典嘅聖誕味道。

3. 【經典回歸】薑餅鮮奶咖啡 (Gingerbread Latte)
另一款英國人最愛！暖暖嘅薑餅香料味，配埋面頭嘅薑餅味忌廉，飲完成個人都暖笠笠。

4. 【經典回歸】蛋酒鮮奶咖啡 (Eggnog Latte)
呢款就比較「英美口味」，鍾意嘅人會超鍾意，怕嘅人會覺得有啲怪。佢係用傳統聖誕飲品 Eggnog（蛋酒）做基底，口感會比較濃稠，帶少少肉豆蔻香。

5. 【抹茶新配搭】
今年仲有兩款新嘅 Matcha 飲品，包括 Toffee Nut Matcha Latte 同 Gingerbread Cream Matcha Latte，將聖誕風味同抹茶結合，都值得一試！

Red Cup Day 嘅重點唔係為咗排隊拎隻杯，而係拎完之後，你真係會用佢！